Auteur Inconnu

1    Belle Érembor QUANT vient en mai que l'on dit as lons jors,
Que Franc de France repairent de roi cort,
Reynauz repaire devant el premier front,
Si s'en passa lez lo meis Erembor,
Ainz n'en dengna le chief drecier amont.
      E! Reynaut amis!

Bele Erembors à la fenestre au jor
Sor ses genolz tient paile de color.
Voit Frans de France qui repairent de cort
E voit Reynaut devant el premier front.
En haut parole, si a dit sa raison:
      `E! Reynaut amis!

`Amis Reynaut, j'ai jà véu cel jor
Se passisoiz selon mon pere tor,
Dolans fussiez se ne parlasse à vos.
--Jel mesfaïstes, fille d'empereor.
Autrui amastes, si obliastes nos.
      --E! Reynaut amis!

`Sire Reynaut, je m'en escondirai;
A cent puceles sor sainz vos jurerai,
A trente dames que avuec moi menrai,
C'oncques nul home fors vostre cors n'amai.
Prennez l'emmende, et je vous baiserai.
     E! Reynaut amis!'

Li cuens Reynauz en monta lo degré.
Gros par espaules, greles par lo baudré,
Blonde to lo poil menu recercelé,
En nule terre n'ot si biau bacheler.
Voit l'Erembors, si comence à plorer.
     E! Reynaut amis!

Li cuens Reynauz est montez en la tor,
Si s'est asis en un lit point à flors,
Dejoste lui se siet bele Erembors;
Lors recomencent lor premieres amors.
     E! Reynaut amis!

[See Notes]

---

2   Pastourelle   XIII. Siècle

DE Saint-Quentin a Cambrai
Chevalchoie l'autre jour.
Lés un boisson esgardai,
Touse i vi de bel atour:
    La colour
To fresche com rose en mai.
   De cuer gai
Chantant la trovai
Ceste chansonnete:
`En non Deu, j'ai bel ami,
    Cointe et joli,
Tant soie je brunete.'

Vers la pastoure tornai,
Quant la vi en son destour,
Hautement la saluai,
Et dis `Deus vos doinst bon jour
     Et honour!

Celle ke ci trové ai,
     Sans delai
Ses amis serai.'
Dont dist la doucete:
`En non Deu, j'ai bel ami
     Cointe et joli,
Tant soie je brunete.'

Delés li seoir alai,
Et li priai de s'amour.
Celle dist: `Je n'amerai
Vos ne autrui par nul tour,
     Sens pastour
Robin, ke fiancié l'ai.
    Joie en ai,
Si en chanterai
Ceste chansonnete:
`En non Deu, j'ai bel ami,
     Cointe et joli,
Tant soie je brunete.'

[See Notes]

---

18   Complainte populaire   (XVe Siècle)

`GENTILZ gallans de France,
Qui en la guerre allez,
Je vous prie qu'il vous plaise
Mon amy saluer.'

`Comment le saluroye
Quant point ne le congnois?'
`Il est bon a congnoistre,
Il est de blanc armé;

`Il porte la croix blanche,
Les esperons dorez,
Et au bout de sa lance
Ung fer d'argent doré.'

`Ne plorez plus, la belle,
Car il est trespassé:
Il est mort en Bretaigne,
Les Bretons l'ont tué.

`J'ay veu faire sa fousse
L'orée d'ung vert pré,
Et veu chanter sa messe
A quatre cordelliers.'

[See Notes]

19   Complainte Normande d'un Auteur inconnu   (XVe Siècle)

HELLAS! Ollivier Basselin,
N'orrons nous poinct de vos nouvelles?
Vous ont les Engloys mys à fin?